Skedus

D’an Aotroù Cam, person Lennon

O ! tremeniad, salud, en deiz evel en noz,
Ar feunteun ’lec’h e vez unan eus hor sent kozh.
Eno, tost d’an elestr, e sav e zremm varvek ;
Da dud ar maezioù eo ar gwellañ amezeg.
’Keit ma reno warno, en o c’hreiz, en o spered,
Ar reol heuliet gantañ ne vo ket dilezet.
E-barzh en e neizh maen, dindan ar wall-amzer,
’Giz ur c’houer e c’houzañv glav, skorn, erc’h ha tommder.
Heñvel outañ, eo bet un den a galon aour
’Vevas en izelder, peurvuiañ ’n ur stad paour.
Gant-se, dirak Doue, eo kreñv da reiñ sikour
D’an holl diegezhioù ha da bep tamm labour.

***

Aotroù Person, c’hwi ’oar, e-barzh e ti Doue
Pep kristen a zeraou, a echu e vuhez,
Hag emaoc’h o tastum hor sent kozh preñvedet
E palez an Hini o deveus azeulet.
Ken galloudus ez int e gloar e Varadoz
Ma’z hen digorint deoc’h gant o gwellañ bennozh.
Da c’hedal, e kouskfet e-kichen ho kavell
’Lec’h ez oc’h bet ganet, e-kreiz Kerne-Uhel,
’Lec’h m’eo ganet ho re, ’lec’h m’eo marvet ho tud,
’Lec’h ma vevit karet, ’lec’h ma talc’hor ho prud.