Skedus

Pa weler ar c’houmoul war duchenn Sant-Mikael
O redek hep ehan, douget gant an avel,
Hag oc’h en em ledañ a-us da Yeun-Elez
Evit gounit buan Boneur hag ar Fouilhez,
Sur ar glav a gouezho, ur glav lous ha foetet...
N’oufen netra tristoc’h em c’horn-douar karet !

Gleb teil e teu an dud dimeus ar parkeier
Ha prim ar vugale ’zastum ar saouteier.
Dour a ruilh er porzhioù. Ar yer en em vodet
’Zo dindan ar c’hirri, o askelloù kouezhet
Ar c’haz ’kichen an tan ; war an treuzioù, ar c’hi,
Pa c’hoanta mont er-maez ’c’hwesha savet e fri...
Ar wazed, petra ’reont ? kempenn binviajoù,
Drailhañ legumajoù er c’hrevier, er c’hrañjoù ;
Ar re aketusañ, o c’horfoù daoubleget,
Da zourañ o fradoù ’ya buan, en ur red.

Tro-war-dro d’an oaled, e-giz evned un neizh,
Pa zeu ar freskadur pe an devezhioù leizh,
Ar wreg, ar vugale, a c’hortoz poent ar goan.
Goude ’vo d’o gwele kaset ar re vihan,
Dezho mamm a lâro : « Klevit war ar prenestr
Ar glav o tiverañ. Ma vefec’h en ul lestr
Brallet war ar mor don, kaletoc’h ’ve ho stad.
’Vid hor martololed, pedomp Doue an Tad. »

Neuze an dudigoù d’o mamm en em unan
Da c’houlenn o sikour gant Jezuz ha sant Yann.