Skedus

O tont eus a Sant-Erwan
Kent distreiñ da Vezou-Bran,
  O tont eus ar pardon,

’Oa ur paour kozh ’vel tosoù
Azezet war e votoù
  E korn ur park melchon ;

Ha gant ar paourkaezh dall-se,
Ur plac’h he dorn ’astenne,
  Ur plac’hig unnek bloaz :

- Ma n’eo hoc’h ene re yen,
tud vat, ’rafet aluzen
  D’ar re n’o deus netra,
  
D’ar re n’o deus er bed-mañ
Na bara na ti bremañ,
  Na gwele ’pad an noz,

Da verc’h ar besketaerien
’Lonkas ur c’homm e Porzh-Gwenn,
  D’ar verc’h ha d’he zad-kozh. -

’Vel ur c’hloc’h mouezh ar plac’hig,
Ar gened war he jodig,
  An naon en he c’halon.

’R bloaz war-lerc’h e Sant-Erwan,
Ar paour dall ’oa e-unan
  E korn ar park melchon.

- Ho merc’h vihan, ma den kaezh,
Evit bezañ leanez,
  D’ar skol hoc’h eus kaset. -

Leanez e ti Doue,
Ar sentezed, an aelez,
  Hi zo bet kemeret.

Doue ne laosk da vervel
An evnigoù hep skoazell,
  D’e vreur, ’ra ar c’hristen.

Perak an Ankoù krignet
Ar bod glas en deus troc’het,
  Derv sec’h ’n e gichen ? -

Ha gouelañ ’rae an den kaezh.
Evit ar re yaouank-rez
  Eus ’r galon an daeroù,

Ha gouelañ neuze zo mat ;
Met daeroù ’r re gozh zo gwad
  War ar re e denno.