Skedus

Paotr ar gward ’c’houlenne emberr
Tost d’an Ti-Poazh digant ur c’houer :

- Ar maout-se pelec’h ’fell dit kas
Ouzh e gernioù ruz-gwenn-ha-glaz. -

- Evit un eured ’vo ret kaout
Da bred warc’hoazh ur kaer a vaout. -

- Da loenig n’a ket d’an eured,
Da leur ’r pardon ne lâran ket. -

Da leur ’r pardon ’an marteze,
Ha mar karez dont ’weli se. -

O tifourkañ da Sant-Treveur,
Un dinell ’oa en-dro d’al leur.

Ha pevar zantad tan ouzhpenn
’Pevar zu d’ar c’hourenerien.

Hou-hou, eme ar c’houer war c’hed,
Hou-hou evel ar Chouanted :

Ha pa zigorjont an dinell,
War benn paotr ar gward ul liñsel ;

E-pad ar c’hannoù an den kaezh
’Us d’ar chistr war e goazez reizh

Na klevet ne rae na gwelet,
Stouv en e skouarn ha mouchet.

Klevet na gwelet na fiñval,
Hualet ’vel un aneval ;

An deiz war-lerc’h, e-maez pa’z eas
’Toull e zor e wreg e gavas.

Difenn gourenoù d’ar Vreizhiz,
Difenn d’ar person e iliz.

Pa oe c’hoarvezet an dra-mañ,
’Oan e Treger o studiañ.

O studiañ ’oan er skolaj
’Vit ober ma belegiaj ;

Un den santel ’vijen-me bet,
Hag ur plac’hig ’neus ma dalc’het.