Skedus

War Venez-Hom pa bar al loar,
Pleg* Douarnenez zo dispar. [Bae]

’Vel ma tosta d’an abardaez,
Ar pesketaer ’traoñ d’ar menez.

Ar pesketaer tro ha distro,
A dro da sec’hañ e rouedoù ;

Azezet goude da c’hortoz
Betek ma vo kou’et ar serr-noz,

’Mañ o selaou mouezh an avel
Ur vouezhig-noz a sav a-bell.

    ****

- N’eo ket ar c’hoabr ’tu all d’ar mor
A weler bemnoz o tigor ?

Kuzhet an heol, n’eo ket bemnoz
Digor du-hont ar baradoz ?

Hag ’hed an traezh piv ’ta ’klever
O kanañ, lâr din, pesketaer ? -

An den a vor en deus lâret :
- Dor vras ar baradoz n’eo ket,

Nemet ur gêr ’sav d’an oabl splann,
Ur gêr veur eus ar poull ledan.

Sell an ti-kêr e traoñ an dour,
Un iliz gant he gorredour.

Ha sell o vont d’an abadenn
Gant he marc’heg ar Vlondinenn.

Bremañ selaou ken kuñv e kan
War an traezh an avelig-hañv,

D’ar c’herreg ’vel ’stok al lanv,
’Vel-se sae seiz en ebatoù.

- Lavar ’ri din-me, pesketaer,
Pa sked ar stered en oabl sklêr,

Perak, stered krog da lugern,
An ebatoù ’gouezh d’an ifern ?

- Ar gêr Is zo kousket du-se
Gant Ahez dindan gazel-ge.

Ar verc’h ’ziroll an abadenn
Bemnoz evit he finijenn ;

Ha tro pleg ar mor graet ganti,
’Tiskenno c’hoazh d’he finiti :

Tec’hit e-pad e tremeno,
Rak div c’hlaouenn tan he selloù.

Ma na ve Doue da’m sikour,
War he lerc’h ’afen ’traoñ an dour. -

Met ’ra sin ar groaz ar paotr kaezh
Pa glev o rezañ brozh Ahez.