Skedus

Distroet ’on da di ma zad,
    La la o la di ra
Distroet ’on da di ma zad,
Daeroù kement ’n hon daoulagad
    ’N deiz m’oan ouzh o c’huitaat ;

’Lec’h zo bet anken ha daeroù,
    La la o la di ra
’Lec’h zo bet anken ha daeroù,
E ti ma zad, deiz ma distro
    Den n’ouie ma anv.

Goude ’welis ma mignoned,
    La la o la di ra
Goude ’welis ma mignoned :
A-raok tregont vloaz tremenet
    Blev gwenn ha barv louedet ;

Hag i, paotred ’oe sonn o fenn,
    La la o la di ra
Hag i, paotred ’oe sonn o fenn,
Nikun na’m sellas ’vit astenn
    E zorn ’vel diagent.

Hag e-lec’h emaint ’hon gortoz,
    La la o la di ra
Hag e-lec’h emaint ’hon gortoz,
’N o gwele pri hon zadoù kozh
    Sioul ha deiz ha noz,

E bered ma bro ’ta bet ’on,
    La la o la di ra
E bered ma bro ’ta bet ’on ;
Eno ’tre ma holl anaon
    ’Soñjen, siwazh ! d’unan*, [T unon]

Ur plac’hig koant pa ’oe ’n he bleuñv,
    La la o la di ra
Ur plac’hig koant pa ’oe ’n he bleuñv ;
Biskoazh n’eo bet ma c’halon leun,
    ’B’oe outi m’on e kañv* : [T keun]

Re gaer ’vit chom pell er bed-mañ,
    La la o la di ra
Re gaer ’vit chom pell er bed-mañ,
Hag aet gant Doue, ’vel bleuñv-hañv
    ’Raok serr-noz o plegañ ;

Kaer em eus bet klask en dachenn,
    La la o la di ra
Kaer em eus bet klask en dachenn,
Na kroaz, na bez, na gwenodenn,
    Netra ken na gaven,

Nemet ur wezenn, en he beg,
    La la o la di ra
Nemet ur wezenn, en he beg
Un evnig savet deus e bleg
    Gant trouz ma zreid flik-flek ;

Hag al labous ouzh ma gervel,
    La la o la di ra
Hag al labous ouzh ma gervel,
Ik-ik ’lâre, ’vel ar bugel
    D’e vamm en e gavell :

Rak an nebeudig* a garer, [nebeudig amzer]
    La la o la di ra
An nebeudig en em garer,
Da vugale c’hoazh e teuer,
    Evnigoù dibreder.

Ha ma fedenn p’am eus lâret,
    La la o la di ra
Ha ma fedenn p’am eus lâret,
He diveskell en deus straket
    Ha d’an neñv tarnijet.

Ma ene paour ’z ay da evnig,
    La la o la di ra
Ma ene paour ’z ay da evnig,
Ha war ar brank gant ar plac’hig,
    ’Lec’h e kanfomp ik-ik.