Skedus

Koue’t a-nevez ’barzh ar Gêr-Vras,
En hon zouez un nozvezh ’teuas :

- Eus bro ar balan glas ’on-me,
’Lec’h e klemm d’an noz ar preizher ;

Er binioù me ’oar c’hwezhañ
Ha gwerzioù kozh ’meus da ganañ. -

Ha goude n’en deus gwelet den
Na bet e anv klevet ken ;

Nemet un devezh zo lâret :
- Hamonig gant Doue zo aet. -

Tremenet ’vel ar gwennili
Goude bet kanet ouzh hon zi.

    ****

Mar klevit ’barzh ar c’hoadoù don
Ur vouezhig o lenvañ ur son,

Son ar barzh divroet e vo,
Dindan gazel-ge e kano.

’Wechoù d’an noz war al lanneg
Ur c’horfig du ’welfet o vesk :

Ur paourig kaezh ’n e binijenn,
Kuitaet e vroig da viken.

Ra vo skañv ar c’hoabr o rezañ
’Us d’al lanneier, en noz-mañ ;

Ha ra stoko didrouz ar mor
D’ar c’herreg en-dro d’an Arvor :

’Vit an tremeniad ma glevo
Ar barzh o lenvañ er c’hoadoù !

Deiz gouel an Anaon