Skedus

Din, din, din… an añjeluz :
Mouezh ar c’hloc’hig zo klemmus
     D’an añjeluz.

Din, din, din… n’eo ket ar c’hloc’h
’Meus klevet bemnoz e Roc’h
     N’eo ken ma c’hloc’h.

Din, din, din… e Breizh-Izel
’N añjeluz hag eñ ’vrañsell
     Em Breizh-Izel ?

Gwechall ’oa gwerz an aelez
En iliz ’ganemp neuze,
     Gwerz an aelez.

Gwechall, ya, en amzer gozh,
Pa beden-me deus an noz,
     En amzer gozh.

Ma c’hoantig ’meus gortozet
’Kichen an dour benniget,
     ’Meus gortozet,

Hag evit ur c’hoarzhadenn
Em c’have c’hoazh en arbenn,
     Ur c’hoarzhadenn :

Kae gouestad, war da seulioù
’Vel un ene paour m’yelo,
     War da seulioù.

Eviti De profundis
’An da lâret ’n un iliz,
     De profundis.

Pegoulz ’klevin din, din, din,
Kloc’hig ar vro ’kanañ din
     E zin, din, din.